Leksion i hapur me temë “Unë jam si ju”

Më datë 07.12.2017 në ambientet e Fakultetit të Shkencave të Edukimit u mbajt leksioni i hapur me temë “Unë jam si ju”, realizuar nga studentët e vitit të parë, dega Master Profesional "Puna sociale me fëmijët dhe familjen", nën koordinimin e pedagoges Denisa Ballhysa.

Të pranishëm në këtë aktivitet ishin zv Dekani i Fakultetit të Shkencave Sociale Dr. Ardian Tana, Përgjegjësi i QKZHE, Prof.As. Dr. Ardian Turku, Përgjegjëse e Departamentit të Shkencave Sociale Prof. As. Dr. Elisabeta Osmanaj, përfaqësues të institucioneve sociale publike dhe private, pedagogë dhe studentë të departamenteve të Shkencave Sociale dhe Psikologjisë, si dhe mediat lokale.

Aktiviteti u hap me fjalën përshendetëse të zëvendës dekanit Dr. Ardian Tana që theksoi rëndësinë e programeve që u vijnë në ndihmë personave me aftësi ndryshe dhe shprehu përgjegjësinë e institucionit që duhet të ketë për këta persona. Z.Shefki Lika, përfaqësues i Shërbimeve Sociale shpalosi programet që bashkia ka në plan të ndërmarrë dhe aktivitet që janë zhvilluar në kuadër të sensibilizimit të komunitetit për personat me aftesisë ndryshe. Gjithashtu theksoi mbështetjen që bashkia ka për target grupin "persona me aftësi ndryshe" dhe përgëzoi koordinatoren për idenë interesante te këtij aktiviteti. Prof. As.Dr. Ardian Turku, drejtor i QKZHE, theksoi se të gjithë duhet t'i mbështesim personat me aftësi ndryshe, pasi është problem i të gjithë shoqërisë.

Referimi i studentes Adivije Hasa, me aftësi ndryshe (në shikim), filloi me një “eksperiment”, dhe më tej u përshkruan termat "aftësi ndryshe" dhe "gjithëpërfshirje", ndikimi i familjes në ecurinë e personave me aftësi ndryshe, arsimimi special dhe gjithëpërfshirës, punësimi i personave me aftësi ndryshe, si dhe eksperienca e saj personale. Ky aktivitet u mbyll me pyetje dhe diskutime të lira me studenten referuese.