Promovohet libri “Austria Letrare”, në Universitetin e Elbasanit

Universiteti i Elbasanit “Aleksandër Xhuvani”, në bashkëpunim me Ambasadën e Austrisë në Shqipëri dhe Fakultetin e Shkencave Humane, kanë promovuar librin “Austria Letrare që prej vitit 1945”.

I pranishëm në këtë event ishte Shefi i misionit i ngarkuar me Punë a.i dr. Christian Steiner.

Paraprakisht, Rektori i Universitetit, prof. dr. Skender Topi, zhvilloi një takim me ambasadorin Steiner duke e njohur atë me historikun, kapacitetet dhe peshën që zë Universiteti i Elbasanit “Aleksandër Xhuvani” , në arsimin e lartë shqiptar.

Në këtë takim u nënvizua edhe bashkëpunimi i mirë që ekziston mes Universitetit të Elbasanit dhe Ambasadës së Austrisë në Shqipëri.

Ambasadori Cristian Steiner falënderoi Rektorin prof. dr. Skender Topi dhe garantoi një bashkëpunim më të frytshëm në të ardhmen.

Më pas në bibliotekën e Universitetit u përurua libri “Austria Letrare që prej vitit 1945” me përkthim të Lindita Komanit. Në këtë takim ishin të pranishëm studentë, pedagogë dhe dashamirës të librit.

Në fjalën e saj, dekania e Fakultetit të Shkencave Humane, prof. as. dr. Majlinda Periu, evidentoi marrëdhëniet e veçanta që ekzistojnë mes Austrisë dhe Shqipërisë që prej më shumë se 100 vitesh. Gjithashtu ajo nënvizoi edhe rolin vendimtar që ka luajtur Austria në momentet e vështira historike të Shqipërisë dhe popullit shqiptar.

Prof. as. dr. Majlinda Perriu përmendi edhe faktin se një numër i madh studiuesish austriakë dhe shqiptarë kanë bashkëpunuar në vite duke i forcuar dhe duke i ngritur në nivel të shkëlqyer marrëdhëniet mes dy popujve në disa fusha.

Ambasadori dr. Christian Steiner në fjalën e tij përforcoi marrëdhëniet mjaft të mira që ekzistojnë mes dy vendeve. Ai u shpreh se ky libër shpalos më së miri vlerat letrare të Austrisë dhe përsos më tej marrëdhëniet historike dhe kulturore mes dy popujve.

Në këtë takim përshëndeti edhe zv. dekania e Fakultetit të Shkencave Humane prof. as. Ema Kristo.

Ndërsa autorja e librit Lindita Komani bëri një ekspoze të kësaj vepre.

Takimi vazhdoi me pyetje dhe diskutime të studentëve dhe panelit.