Universiteti i Elbasanit organizoi Konferencën Shkencore Ndërkombëtare “Punëtorë të Shquar të Albanologjisë”

Universiteti i Elbasanit organizoi Konferencën Shkencore Ndërkombëtare “Punëtorë të Shquar të Albanologjisë”

Universiteti i Elbasanit, “Aleksandër Xhuvani, në bashkëpunim me Akademinë e Studimeve Albanologjike, organizuan Konferencën Shkencore Ndërkombëtare “Punëtorë të Shquar të Albanologjisë”.

Mirëseardhja e të ftuarve u zhvillua në Muzeun Etnografik të qytetit Elbasan nën kujdesin e Përgjegjëses së Departamentit të Gjuhësisë prof. as. dr. Teuta Toska dhe më tej seancat plenare u mbajtën në Bibliotekën e Universitetit të Elbasanit.

Në këtë aktivitet të rëndësishëm shkencor ishin të ftuar figura të shquara në fushën e Albanologjisë, Gjuhësisë dhe Letërsisë të institucioneve dhe universiteteve brenda dhe jashtë vendit.

Në fjalën e tij, zv. rektori prof.as.dr. Peçi Naqellari, u shpreh se “Ky aktivitet përkon me dy momente tepër të rëndësishme për qytetin e Elbasanit:

Së pari, përkon me vitin jubilar të 110 vjetorit të çeljes së shkollës Normale,

Së dyti, përkon me vigjiljen e Ditës së Verës”.

Më tej ai theksoi se “Elbasani, si një qytet i traditës dhe kulturës, ka arritur ndër vite të edukojë e të arsimojë breza e breza mësuesish, studiuesish e akademikësh, të cilët sot lartësojnë emrin e këtij qyteti.

Gjithashtu prof. Naqellari nënvizoi se “Konferenca Shkencore Ndërkombëtare “Punëtorë të Shquar të Albanologjisë”, ka mbledhur sot studiues e akademikë të cilët nëpërmjet punimeve të tyre vlerësojnë dhe lartësojnë figurat e albanologjisë, si një trashëgimi kulturore e intelektuale për brezat e sotëm e të ardhshëm të filologëve shqiptarë. Janë pikërisht këto aktivitete të cilat zgjerojnë e forcojnë lidhjet e bashkëpunimit me universitetet e tjera brenda e jashtë vendit”.

Universiteti i Elbasanit, ka mbështetur dhe do të mbështesë, çdo ftesë për bashkëpunim, ku aktorët kryesorë janë studentët dhe bota akademike. Pjesëmarrësit prezantuan në seancat plenare punimet më të fundit shkencore rreth figurave të shquara të Albanologjisë.