Universiteti i Elbasanit organizon Konferencën e 10-të Ndërkombëtare Mjekësore të Specialiteteve

Në Universitetin e Elbasanit, “Aleksandër Xhuvani”, Fakulteti i Shkencave Mjekësore Teknike, në bashkëpunim me Qendrën Spitalore, Universitetin e Barit dhe Aquila-s në Itali, organizuan Konferencën e 10-të Ndërkombëtare Mjekësore të Specialiteteve. Kjo konferencë, ne tri ditët e zhvillimit të saj, mblodhi mbi 200 studiues të specialiteteve të ndryshme mjekësore nga e gjithë bota.

Punimet e konferencës u çelën nga Dekani i Fakultetit të Shkencave Mjekësore Teknike, prof. as. dr. Shkëlqim Hidri, i cili njohu pjesëmarrësit me historikun e kësaj konference duke u ndalur në bashkëpunimin e jashtëzakonshëm me institucionet brenda dhe jashtë vendit.

Në fjalën e tij, Rektori i Universitetit të Elbasanit, prof. dr. Skender Topi, rezervoi një përshëndetje të veçantë për profesorët e ardhur nga universitetet italiane dhe vendeve të ndryshme të botës. Ai nënvizoi se “ Bashkëpunimi mes institucioneve tona ka dhënë e vazhdon të japë rezultate të shkëlqyera. Konferenca ka pasur një interes të madh me mbi 450 kërkesa për pjesëmarrje. I gjithë qëllimi është standardizimi i protokolleve kombëtare me ato ndërkombëtare të mjekësisë për t’i ardhur në ndihmë, mjekëve, pacientëve si dhe studiuesve të specialiteteve të ndryshme mjekësore”.

Gjithashtu ai theksoi se “Fakulteti i Shkencave Mjekësore dhe Teknike në Elbasan është sot më i kërkuar në Shqipëri me kuota të realizuara 100% dhe me cilësi të studentëve gjithnjë e në rritje”.

Në fjalën e saj përshëndetëse Drejtoresha e Qendrës Spitalore Rajonale Elbasan, prof. as. dr. Dasantila Tahiraj, falenderoi stafin e Fakultetit të Shkencave Mjekësore Teknike dhe stafin e Qendrës Spitalore, për punën e jashtëzakonshme që bëjnë në auditore dhe reparte.

Konferenca është e akredituar nga Qendra Kombëtare e Edukimit në Vazhdim, për profesionistët e shëndetësisë.