Universiteti i Elbasanit i akordoi titullin “Honoris Causa” profesor Maurizio Giuliani.

Universiteti i Elbasanit “Aleksandër Xhuvani”, përmes një ceremonie solemne në Senatin Akademik, ka akorduar titullin “Honoris Causa” për profesorin italian të Universitetit të L` Aquila, Maurizio Giuliani. Në fjalën e tij, në cilësinë e Kryetarit të Senatit Akademik, Rektori, prof. dr. Skender Topi, theksoi se “kjo ceremoni i dedikohet një mjeku, një profesori por mbi të gjitha një miku të këtij Universiteti. Universiteti i Elbasanit është Universitet i traditës e kulturës elbasanase, por mbi të gjitha një Universitet i suksesit. Bashkë me studentët ne jemi një trup i vetëm i cili bashkëvepron sinkron për të përmbushur misionin tonë, arsim të lartë cilësor e modern.”

Dy recensuesit prezantuan veprimtarinë akademike, shkencore si dhe bashkëpunimin mes dy institucioneve, Universitetit të Elbasanit dhe Universitetit të L`Aquila Itali.

Më pas Rektori, i ka dorëzuar prof. Maurizio Giuliani, titullin “Honoris Causa” me motivacionin:

“Për kontribut të veçantë në arsimin e lartë shqiptar dhe kërkimin shkencor lidhur me teknologjitë e reja në fushën e shkencave mjekësore-teknike”.

“Ju keni treguar të jeni vizionar, bashkëpunues, inovator por mbi të gjitha pjesë e pandashme e Universitetit të Elbasanit.”, citoi Rektori Topi.

Mjaft i emocionuar nga ky titull prof. Giuliani u shpreh se që kur ka shkelur në Shqipëri ka njohur një tokë të jashtëzakonshme me njerëz të mrekullueshëm. Ai tha se ndjehet mjaft i vlerësuar dhe krenar për këtë titull. Ai ka nënvizuar se lidhja mes Universitetit të L` Aquila dhe Universitetit të Elbasanit është e shkëlqyer dhe se meritë të padiskutueshme ka rektori Skender Topi. Ndër të tjera, prof. Giuliani deklaroi se do të vazhdojë të bëjë më të mirën për Shqipërinë.