Pjesëmarrja e studentëve të UE në Youth Bootcamp “E-citizens, Albania in Europe!”

Pas përfundimit me sukses të fazës së parë të nismës “E-citizens, Albania in Europe!”, në Universitetin e Elbasanit “Aleksandër Xhuvani”, Rrjeti i Studentëve Shqiptarë në Botë – AS@N në bashkëpunim me Shoqatën e Konsujve të Nderit në Shqipëri, me mbështetjen e Bashkimit Evropian, zhvilluan tre trajnime me pjesëmarrje të gjerë të studentëve nga universiteti ynë: “Historia e Bashkimit Europian”; “Zgjerimi i BE-së dhe anëtarësimi i Shqipërisë në BE”; “Qytetaria dhe vlerat Europiane. Programet për të rinjtë”.

Në fazën e dytë të kësaj nisme, Rrjeti AS@N përfundoi me sukses Bootcamp-in 3 ditor “Unë jam Europa” në Tiranë, më 01, 03 dhe 07 tetor, pjesë e të cilit ishin 50 studentë, ku 11 prej tyre nga Universiteti i Elbasanit “Aleksandër Xhuvani”. Studentët, të ndarë në grupe, prezantuan pesë nisma dhe një juri e përbërë nga ekspertë kombëtarë dhe ndërkombëtarë përzgjodhi “Rinia shqiptare dhe Vullnetarizmi”, të grupit UNIONS si më të mirën. Ideues të nismës fituese, e cila ka për synim promovimin e vullnetarizmit dhe projekteve rinore në komunitet ishin edhe Anxhela Biba (Shkenca Juridike në Sektorin Publik), Sara Lluca (Gjuhë angleze) dhe Gersi Hoxha (Biologji-kimi). Ideja e tyre do të mbështetet financiarisht dhe do të realizohet përgjatë periudhës tetor-dhjetor 2019 në Elbasan, Tiranë dhe Durrës.

Të gjithë studentët e tjerë u pajisën me certifikatën e pjesëmarrjes.