Universiteti i Elbasanit “Aleksandër Xhuvani” organizoi Konferencën e Parë Ndërkombëtare në Logopedi dhe Fizioterapi

Fakulteti i Shkencave Mjekësore Teknike, Departamenti i Lëndëve Paraklinike, në bashkëpunim me Universitetin “Aldo Moro” të Barit në Itali, organizuan në datat 14-15 qershor 2019 Konferencën e Parë Ndërkombëtare në Logopedi dhe Fizioterapi.

Në fjalën përshëndetëse Rektori i Universitetit të Elbasanit, Prof. dr. Skender Topi u shpreh se “kjo Konferencë ka një rëndësi të veçantë shkencore dhe akademike pasi përkon edhe me 110 vjetorin e çeljes së Shkollës “Normale” që konsiderohet si viti i krijimit të këtij Universiteti”.

Më tej ai theksoi se “gjatë këtij viti akademik, falë punës së palodhur , të përkushtuar dhe profesionale të stafit akademik dhe ndihmës akademik, është finalizuar çelja e programeve të reja të studimit, të cilat ju ofrojnë mundësi të pafundme studentëve dhe një orientim më të mirë të tyre drejt tregut të punës të cilin aspirojnë”.

Rektori evidentoi në fjalën e tij se “element shumë i rëndësishëm i cilësisë është edhe bashkëpunimi dhe eksperiencat e vyera të institucioneve partnere në Evropë e më gjerë. Për këtë arsye, në aktivitetet shkencore akademike, gjithnjë ka pasur interes dhe pjesëmarrje të gjerë të studiuesve evropianë, të cilët kanë ndarë eksperiencat dhe punën e tyre kërkimore me ju, duke u bërë shpesh herë nismëtarë të projekteve të reja të kërkimit dhe zhvillimit”.

Dekani i Fakulteti Prof. as. dr. Shkëlqim Hidri u shpreh se “ Fakulteti i Shkencave Mjekësore Teknike, sot, është Fakulteti më i kërkuar prej studentëve, me numrin më të lartë të të regjistruarve dhe me kuota të realizuara 100%. Në këtë Fakultet ofrohen 6 programe studimi në bachelor, 6 programe studimi në master profesional dhe 2 programe studimi në master i shkencave ”.

Në këtë Konferencë përshëndetën edhe profesorë të Universitetit “Aldo Moro” të Barit Itali, prof. Luigi Santacroce dhe prof. Francesco Fischetti.

Gjithashtu përshëndetën Drejtoresha e Qendrës Spitalore të Elbasanit, Prof. as. dr. Dasantila Tahiraj, Presidentja e Urdhrit të Infermierëve të Shqipërisë znj. Blerina Duka etj.

Gjatë dy ditëve të Konferencës, relatorë nga vendi dhe bota, prezantuan punimet më të fundit shkencore në fushën e mjekësisë.