Ditët e ERASMUS + në Universitetin e Elbasanit

U zhvilluan në Universitetin e Elbasanit, "Aleksandër Xhuvani", ditët e ERASMUS + nën sloganin "ERASMUS + days. A story to be told..."

Në këtë aktivitet morën pjesë 22 përfaqësues të universiteteve partnere me të cilat UE bashkëpunon prej vitesh. Ceremonia e hapjes u përshëndet nga Rektori i UE, Prof. dr. Skender Topi, i cili ndër të tjera theksoi: Java e ERASMUS+ organizohet për herë të parë në Universitetin e Elbasanit. Jo pa qëllim këtë aktivitet e kemi titulluar "Një histori për tu treguar", sepse falë programit ERASMUS+, secili prej nesh në këtë sallë, e ka një të tillë. Ka mbi 30 vjet që ERASMUS+ është programi më i suksesshëm për arsimin rininë dhe sportin.

Ky program ka mbështetur studentët e të rinjtë që të fitojnë përvoja të reja, të zhvillojnë aftësi jetësore dhe të zënë vendin e tyre në shoqëri si qytetarë të sigurt dhe të angazhuar. ERASMUS+ na ka treguar se duke iu hapur të tjerëve, mund t'u japim mundësi shumë të rinjve të përjetojnë se çfarë do të thotë të jesh një qytetar evropian. Ai sjell ndryshime thjesht duke i ekspozuar të rinjtë dhe sistemet arsimore ndërkombëtare. Prandaj unë dua të inkurajoj edhe më shumë studentë që të marrin pjesë në këtë përvojë.

Gjithashtu përfaqësuesja e Zyrës Kombëtare të ERASMUS + në Tiranë, znj. Elona Saraçi, përshëndeti aktivitetin dhe përgëzoi Universitetin e Elbasanit për organizimin e tij si dhe pjesëmarrjen e gjerë të universiteteve partnere.

Zv. Rektori i UE, Prof. as. dr. Peçi Naqellari, në fjalën e tij të mirëseardhjes, cilësoi se ERASMUS + është një nga shembujt më të mirë të asaj që BE mund të bëjë për qytetarët e saj. Ky aktivitet sot, të shërbejë si një pikënisje për forcimin e bashkëpunimit, zgjerimin dhe nxitjen e tij në të ardhmen, duke ulur kostot, rritur efiçencën dhe përfitimet e ndërkombëtarizimit.

Aktiviteti i përmbyll me panairin ERASMUS + fair UE, i hapur për studentët dhe stafet akademike të të gjithë programeve të studimit.