Universiteti i Elbasanit, seancë dëgjimore me Kuvendin e Shqipërisë në kuadër të disa ndryshimeve kushtetuese

Universiteti i Elbasanit “Aleksandër Xhuvani”, në bashkëpunim me Kuvendin e Shqipërisë, organizuan seancën dëgjimore në kuadër të nismës ligjore “Për disa shtesa dhe ndryshime të Kushtetutës së Republikës së Shqipërisë”.

Ky takim u realizua pas nënshkrimit të memorandumit të bashkëpunimit mes 23 universiteteve në shkallë vendi dhe Kuvendit të Shqipërisë në kuadër të fuqizimit të parlamentarizmit dhe rritjes së kontributit të akademikëve në procesin ligjvënës.

Në fjalën e marrë me këtë rast, Rektori i Universitetit të Elbasanit, prof.dr. Skender Topi, u shpreh mes të tjerash se:

“Institucionalizimi i këtij bashkëpunimi është i rëndësishëm për tri arsye kryesore:

Së pari, akademikët e Universitetit të Elbasanit angazhohen në cilësinë e ekspertëve të ndryshëm në lidhje me asistencën tekniko-akademike, oponencën ligjore apo draftimin e projektligjeve në Kuvend.

Së dyti, stafit akademik i mundësohet akses në hulumtimin e bibliotekës së Kuvendit.

Së treti, ofrohen mundësi reale mbështetëse për studentët në lidhje me zhvillimin e praktikave, temave të diplomimit si dhe studimeve doktorate”.