Fjala përshëndetëse e Rektorit të Universitetit të Elbasanit, “Aleksandër Xhuvani”, Prof. Dr. Skender Topi, me rastin e fillimit të vitit të ri akademik 2018-2019

Të dashur studentë! Mirësevini në Universitetin e Elbasanit “Aleksandër Xhuvani”! Nisja e vitit të ri akademik, e gjen institucionin tonë plotësisht të gatshëm për të realizuar procesin mësimor dhe kërkimin shkencor. Në zgjedhjen tuaj, ju i besuat një prej universiteteve më të vjetër dhe më me tradita në Shqipëri. Sot ky Universitet ju siguron programe të reja studimi, të cilat i përgjigjen nevojave të tregut të punës si dhe të gjitha standardet bashkëkohore për përgatitjen tuaj. Në Universitetin e Elbasanit janë krijuar kushtet e një infrastrukture, e cila ju mundëson akses në laboratore moderne, salla leksionesh dixhitale si dhe një bibliotekë online. Në kuadër të strategjisë së ndërkombëtarizimit, Universiteti i Elbasanit është partner me shumë universitete europiane e më gjerë, duke ofruar mundësi pa fund për studentët dhe stafin akademik. Studentët kanë mundësi të ndjekin periudhat e tyre të studimit në këto universitete duke u pajisur me bursa. Këto eksperienca ndihmojnë në mirëformimin e tyre dhe u japin mundësi reale studentëve për integrimin në tregun e punës vendas e më gjerë. Janë të gjitha këto arritje që u morën parasysh nga Agjencia e Akreditimit dhe që e renditin Universitetin tonë ndër 10 më të mirët në Shqipëri.

Edhe njëherë ju falenderojmë që zgjodhët Universitetin tonë dhe suksese në vitin e ri akademik!

Rektori i Universitetit të Elbasanit “Aleksandër Xhuvani” Prof.dr. Skender TOPI