Universiteti i Elbasanit pret ambasadorët e Francës dhe Rumanisë në kuadër të bashkëpunimit të vendeve frankofone.

Në Universitetin e Elbasanit "Aleksandër Xhuvani" në kuadër të Pranverës së Frankofonisë në Shqipëri, është zhvilluar aktiviteti “Momentet kryesore të marrëdhënieve historike mes dy popujve frankofonë si Rumania dhe Shqipëria”.

Ky aktivitet shënon bashkëpunimin e radhës të suksesshëm të Universitetit të Elbasanit me aktorë të rëndësishëm të profilit ndërkombëtar, kombëtar, lokal e atij akademik. Me këtë rast ishin të pranishëm Ambasadorja e Francës në Shqipëri, znj. Christina Vasak,, Ambasadori i Rumanisë, z. Mircea Perpelea, profesorët Neritan Ceka, Kopi Kyçyku, personel akademik të Universitetit të Elbasanit, përfaqësues të pushtetit vendor si dhe studentë frankofonë.

Ambasadorët u pritën nga zv. rektori Peçi Naqellari i cili u ka përcjellë falënderimet për prezencën në këtë aktivitet të rëndësishëm. "Ky aktivitet shënon bashkëpunimin e radhës të suksesshëm të Universitetit të Elbasanit me aktorë të rëndësishëm të profilit ndërkombëtar, kombëtar, lokal e atij akademik", deklaroi zv. rektori Naqellari.

Më tej prof. Naqelllari u ndal në rëndësinë e këtij bashkëpunimi në aspektin politik, ekonomik, shoqëror e kombëtar për integrimin e vendit në Bashkimin Evropian.

Gjithashtu ai evidentoi faktin e rritjes së mobilitetit të pedagogëve dhe studentëve të Universitetit të Elbasanit, mjaft prej të cilëve po studiojnë në universitete të Evropës dhe mbarë botës.

Të ftuarit mbajtën tri kumtesa me në fokus momentet kryesore të marrëdhënieve historike mes dy popujve frankofonë si Rumania dhe Shqipëria.