Shënohet suksesi i radhës në Universitetin e Elbasanit “Aleksandër Xhuvani”

Me ftesë të profesorit Luigi Dei, Rektor i Universitetit të Firences Itali, Rektori i Universitetit të Elbasanit Prof. Dr. Skender Topi zhvilloi një takim në Universitetin e njohur italian. Pasi kanë diskutuar gjatë këtij takimi mbi mundësitë e vendosjes së një marrëdhënieje të vazhdueshme, dy rektorët nënshkruan edhe marrëveshjen e bashkëpunimit mes dy institucioneve, që do t'i hapë rrugë një bashkëveprimi të qëndrueshëm në të ardhmen, në interes të stafeve akademike dhe studentëve të të dy universiteteve.

Rektori Dei theksoi se 900 studentë shqiptarë studiojnë aktualisht në Universitetin e Firences, duke qenë një vlerë e shtuar në ambientet universitare dhe për qytetin. Ndërkohë Rektori Skender Topi nga ana e tij ka shprehur angazhimin maksimal në emër të Universitetit të Elbasanit, për të gjetur fusha e mundësi kooperimi mes dy universiteteve. Për këtë arsye Rektorët kanë shkëmbyer ftesa për organizimet e përbashkëta shkencore, akademike e studentore.

Gjatë takimit të zhvilluar u diskutuan edhe detaje të bashkëpunimit që tashmë ka nisur. Aktualisht Universiteti i Firences drejton projektin T@sk të financuar nga Bashkimi Europian, për rritjen e kapaciteteve të punonjësve socialë edhe në Shqipëri. Në këtë projekt është partner edhe Universiteti i Elbasanit, përfaqësuar nga Departamenti i shkencave sociale, pranë Fakultetit të Shkencave të Edukimit.