Ambasadori Helmut Hoffman takon Rektorin Liman Varoshi

Ambasadori i Republikës së Gjermanisë në Shqipëri, Helmut Hoffman ka zhvilluar një vizitë në Universitetin “Aleksandër Xhuvani” të Elbasanit. Fillimisht ambasadori u prit nga Rektori i këtij Universiteti Prof.Dr. Liman Varoshi. Rektori i ka paraqitur ambasadorit Hoffman një tablo të zhvillimeve dhe arritjeve të Universitetit të Elbasanit, duke theksuar se ky institucion është ndër më të rëndësishmit e mbarë hapësirës shqiptare të arsimit të lartë. Ai e ka vënë theksin edhe në trashëgiminë e madhe që ka Universiteti, si vazhdues i Normales së Elbasanit, shkollës së parë që nxirrte nga bankat e saj, arsimtarë për mbarë trevat ku jetojnë e banojnë shqiptarët.

Duke u ndalur tek situate aktuale e zhvillimit të arsimit të lartë Rektori Liman Varoshi ka thënë se Universiteti i Elbasanit, e ka vënë theksin tek rritja e vazhdueshme e cilësisë së mësimdhënies dhe kërkimit shkencor, si premisë dhe garanci për zhvillimin e mëtejshëm dhe rritjen e rolit të Universitetit në Shqipëri dhe më gjerë. Ai ndërkohë i kërkoi Ambasadorit Helmut Hoffman edhe impenjimin e tij personal në drejtim të ndihmës për programet e studimit që kanë lidhje me gjuhën gjermane. Rektori ka theksuar se institucioni që ai drejton e sheh gjuhën gjermane, si mundësi e madhe për të rinjtë shqiptarë për tu integruar në tregun e punës.

Kjo ide është mbështetur edhe nga Ambasadori gjerman në Shqipëri Helmut Hoffman. Ai ka deklaruar dhe sugjeruar që Universiteti i Elbasanit të orientojë programet e studimit drejt degëve të ndërthurura. Ambasadori ka theksuar se “nëse do të kemi infiermerë apo punonjës të teknologjisë së informacionit që zotërojnë gjuhën gjermane, atëherë mundësitë e tyre të punësimit do të ishin tepër të mëdha në Gjermani, pa përjashtuar këtu edhe cikle të tjera studimi”. Helmut Hoffman premtoi mbështetjen e tij personale dhe të ambasadës që drejton në këtë kuadër.

Pas takimit me Rektorin e Universitetit, Ambasadori Helmut Hoffman ka zhvilluar një takim me pedagogë të gjuhës gjermane pranë Universitetit të Elbasanit, ku ai ka shprehur mbështetjen për punën e tyre dhe ka premtuar kontakte më të shpeshta në të ardhmen.