Organizohet në Universitetin e Elbasanit "Aleksandër Xhuvani", konferenca në kuadër të "Ditës Ndërkombëtare të Gjuhës Rome"

Organizohet në Universitetin e Elbasanit "Aleksandër Xhuvani", konferenca në kuadër të "Ditës Ndërkombëtare të Gjuhës Rome".

Në ambjentet e Universitetit të Elbasanit, është organizuar një konferencë në kuadër të ditës Ndërkombëtare të Gjuhës Rome, ku u trajtua historiku, zhvillimi etnokulturor, vështirësitë e komunitetit dhe sfidat e ruajtes së gjuhës Rome. Një kontribut të rëndësishëm në njohjen, zhvillimin dhe përhapjen e gjuhës Rome, ka  dhe Universiteti i Elbasanit, si i pari dhe i  vetmi universitet në Shqipëri, që ofron program studimi Bachelor në "Gjuhë Shqipe dhe Rome, gjithashtu duke kryer studime të vazhdueshme për njohjen dhe përhapjen e saj.

Në fjalën e saj përshëndetëse znj.Elvira Fetahu, zv rektore e Universitetit të Elbasanit, theksoi rolin që ka universiteti në njohjen dhe studimin e kësaj gjuhe, organizimin e aktiviteteve të ndryshme për promovimin e saj dhe zgjidhjen e problematikave që shoqërojnë këtë komunitet.

Znj. Jutta Gützkow, Shefe e Zyrës së Këshillit të Europës në Shqipëri, përgjatë prezantimit të programit “Romacted”, theksoi rëndësinë e bashkëpunimit për zhvillimin e këtij komuniteti dhe gjuhës Rome, hapja dhe analizimi i kurrikulave të reja dhe programeve për gjithëpërfshirjen e komunitetit romë në Shqipëri.

Pjesëmarrësit e pranishëm, shprehën nevojën në nxitjen e integrimit dhe zbatimin e projekteve, implementimin e strategjive të reja, shtimin e kurrikulave dhe përmirësimin e cilësisë të përmbajtjes së tyre.