Nis viti i ri akademik në Universitetin “Aleksandër Xhuvani”

Në Universitetin “Aleksandër Xhuvani” të Elbasanit është zhvilluar ceremonia e nisjes së vitit të ri akademik 2015-2016. Përveç Rektorit Prof.Dr. Liman Varoshi, Zv. Rektorëve dhe dekanëve të këtij Universiteti, në ceremoni të pranishëm ishin edhe Kryetari i Bashkisë së Elbasanit Qazim Sejdini dhe Prefekti i Qarkut Arben Kamami.

Duke iu drejtuar studentëve të pranishëm në këtë ceremoni, Rektori Liman Varoshi ka theksuar edhe njëherë impenjimin e tij maksimal dhe të stafit që ai drejton, për të arritur qëllimin e një arsimimi sa më cilësor të studentëve. Ai ka theksuar se në këtë drejtim, Universiteti i Elbasanit ofron një staf akademik tepër të kualifikuar dhe ambiente tepër komode. Ai ka përmendur Bibliotekën Universitare, e cila përveç një numri tepër të madh të titujve të librave, ofron edhe lidhjen online me publikimet shkencore të Universitetit të Oksfordit. Rektori Liman Varoshi është shprehur i bindur se ata që e kanë zgjedhur Universitetin e Elbasanit për të vazhduar rrugën e tyre në fushën e dijes, nuk do të mbeten të zhgënjyer, përkundrazi do të arrijnë të kenë një diplomë tepër të vlefshme në tregun e punës në të ardhmen. 

Lexo më shumë

Organizohet ne UE takimi: “Ngritja e kapaciteteve të universiteteve shqiptare për qeverisje të brendshme”

Më 16 Qershor 2015, në Universitetin “Aleksander Xhuvani”, Elbasan u zhvillua seminari me titull ” Ngritja e kapaciteteve të universiteteve shqiptare për qeverisje të brendshme”, organizuar nga Zyra Erasmus+ në Tiranë në bashkëpunim me Universitetin e Elbasanit. Në seminar morën pjesë rektorë, dekanë, anëtarë të stafeve akademike nga  IAL-të e Tiranës, Korçës, Shkodrës etj, përfaqësues të Ministrisë së Arsimit dhe Sportit,  si dhe përfaqësues të Universiteteve të ndryshme të vendit.

Në fjalën e tij përshëndetëse rektori i Universitetit të Elbasanit, Prof. Dr. Liman Varoshi theksoi rëndësinë e këtij seminari dhe nënvizoi faktin se ngritja e kapaciteteve të universiteteve shqiptare është një çështje aktuale e cila meriton të vlerësohet maksimalisht dhe të jetë objekt i diskutimeve për zgjidhje adekuate. 

Seminari trajtoi sfidat e situatës aktuale të qeverisjes duke filluar nga niveli i institucionit deri në njësinë bazë të departamentit, ndryshimet që sjell reforma dhe ligji i ri i arsimit të lartë, me qëllimin që të  përcjellë zërin e personelit të IAL-ve në një dokument final me rekomandime për hartimin e akteve të ardhshme nënligjore.

Në këtë seminar mori pjesë dhe eksperti ndërkombëtar, Stephen Hagen, Profesor Emeritus, Zv/rektor për Menaxhimin dhe Qeverisjen në Qendrën Kombëtare të Kërkimit në Shën Petërburg, Zv/kancelar i Universitetit të Uellsit, në Britaninë e Madhe, Drejtor i Kërkimit, Biznesit dhe Inovacionit në Universitetin e Anglisë Perëndimore të Bristolit, etj. Ai prezantoi modelet më të suksesshme të qeverisjes në universitetet e vendeve më të zhvilluara evropiane, si dhe do të trajtoi aspektet kryesore të organizimit të brendshëm të departamentit.

Tematika të tjera të këtij seminari ishin ”Situata aktuale e qeverisjes së Insitucioneve të Arsimit të Lartë shqiptar nga Prof. Dr. Flamur Bidaj, pedagog në Universitetin Politeknik të Tiranës, “Zhvillime të mëtejshme të qeverisjes së Insitucioneve të Arsimit të Lartë në kuadër të reformës dhe ligjit për arsimin e lartë” nga Prof. dr. Anila Paparisto, pedagoge e Universitetit të Tiranës, etj.