Takim në Bibliotekën universitare me rastin e Ditës ndërkombëtare të Librit

Në datën simbolikë, kushtuar Librit, 23 prill, në mjediset e bibliotekës së Universitetit “Aleksandër Xhuvani” u organizua një takim me krijues, studentë, lexues të bibliotekës, pedagogë, përfaqësues nga biblioteka e rrethit, dashamirës të librit e të letërsisë. Në këtë takim, të ftuar të nderit ishin shkrimtari i mirënjohur i letërsisë për fëmijë dhe të rritur, z.Viron Kona, si edhe shkrimtarja e përkthyesja zj.Geverina Muzhaqi. Vlen të përmenden edhe të ftuarit nga biblioteka e rrethit,“Qemal Baholli”, drejtore zj.Aida Gashi e specialistja zj.Manjola Hatellari. Pas fjalës së hyrjes nga drejtori i Bibliotekës universitare Elvis Dhono, aktiviteti vijoi me prezantimin e organizuar nga studentët e programit te studimit gjuhë-letërsi, në konsultë me bibliotekën. Pasi morën fjalën të ftuarit e nderit, disa prej studentëve interpretuan për të pranishmit materiale të ndryshme letrare. Diskutimet shoqëruan këtë event në funksion të së ardhmes për zhvillimin e kulturës së librit. Formati i programit synoi harmonizimin mes palëve: Institucionit dhe studentëve. Në fund, studentët referues, u vlerësuan nga një juri e përbërë nga z.Viron Kona, zj.Geverina Muzhaqi dhe studentja Frosina Tola mbi krijimin dhe interpretimin më të mirë. Fituese ishin: Fjorentina Balla për krijimin më të mirë dhe Era Sulovari për interpretimin më të mirë.Të dy studentët, morën nga një libër si dhuratë simbolike, me qëllim inkurajimin e tyre në ecjen përpara në rrugën e dijes dhe të letërsisë.