Panairi i Bamirësisë “Punonjësi social sjell ngjyrat e jetës”

Në datën 8 maj 2017, Departamenti i Shkencave Sociale në mbështetje të Dekanatit organizoi Panairin e Bamirësisë “Punonjësi social sjell ngjyrat e jetës”, i cili u realizua nga studentët e vitit të dytë të degës Punë Sociale. Qëllimi i këtij aktiviteti ishte sensibilizimi i të gjithë aktorëve të politikave sociale që kontribuojnë në komunitet nën moton “Ne s’mund të bëjmë gjëra të mëdha, por gjëra të vogla me dashuri të madhe”. Studentët realizuan punime të ndryshme, të cilat do t’u dhurohen individëve në nevojë për promovimin e figurës së punonjësit social, i cili është figurë profesionale që i vjen në ndihmë gjithë komunitetit. Pjesëmarrës në këtë aktivitet ishin organizata joqeveritare, studentë dhe pedagogë të Fakultetit të Shkencave të Edukimit dhe media lokale. 

Leksion i hapur nga fr. Joseph Elull O.P me temë “Dialogu ndërfetar: Sfidat dhe aspiratat”

Departamenti i Shkencave Sociale në FSHE, në bashkëpunim me Qendrën e Bashkëpunimit Ndërfetar, në datë 28.04.2017 organizoi leksionin e hapur “Dialogu ndërfetar: Sfidat dhe aspiratat”, prezantuar nga fr. Joseph Elull O.P, delegat i Arshipeshkëvisë së Vatikanit në dialogun ndërmjet Krishtërimit dhe Islamit. Leksioni i zhvilluar me studentë të shkencave sociale trajtoi nevojën drejt një qasjeje gjithëpërfshirëse  në kuadër të përballjes me sfidat e fenomeneve të radikalizimit dhe ekstremizmit të dhunshëm, duke nxitur afrimin e kulturave dhe dialogut fetar në të mirë të bashkëjetesës. 

Leksion i hapur nga Prof.Dr. Gaetano Dammacco me temë “Shteti dhe e drejta e lirisë fetare”

Departamenti i Edukimit Qytetar në FSHE, në bashkëpunim me Universitetin e Barit “Aldo Moro”-Itali, në datë 28.04.2017 organizoi leksionin e hapur me temë “Shteti dhe e drejta e lirisë fetare”, prezantuar nga Prof.Dr. Gaetano Dammacco. Leksioni trajtoi rëndësinë e lirisë fetare në sferën e të drejtave themelore të njeriut, si një aspekt shumë i rëndësishëm i lirive personale, duke e lidhur me traktatet e ndryshme ndërkombëtare. Morën pjesë studentë të degëve Filozofi-Sociologji dhe Edukatë Qytetare, të cilët drejtuan pyetje dhe diskutuan rreth temës së trajtuar.

Leksionin e hapur nga Prof.Dr. Afrim Krasniqi me temë “Mbi demokracinë e brendshme në partitë politike shqiptare”

Departamenti i Edukimit Qytetar  në FSHE, në bashkëpunim me Institutin e Studimeve Politike në Tiranë dhe Albanian Institute for International Studies (AIIS), në datë 06.04.2017 organizoi leksionin e hapur me temë “Mbi demokracinë e brendshme në partitë politike shqiptare”, prezantuar nga Prof.Dr.Afrim Krasniqi. Prezantimi ishte një studim mbi demokracinë e brendshme dhe funksionimit të partive politike shqiptare gjatë historisë 26 vjeçare të pluralizmit politik në Shqipëri. Morën pjesë studentë të degëve Filozofi-Sociologji dhe Edukatë Qytetare, të cilët drejtuan pyetje dhe diskutuan rreth temës së trajtuar. 

Akademia e Arbitrimit “zbret” edhe në Universitetin e Elbasanit

Fakulteti i Shkencave te Edukimit dhe Departamenti i Edukimit Fizik dhe Sporteve pranë këtij fakulteti, kanë qenë ndalesa e parë e një turi takimesh të Federatës shqiptare të Futbollit, në kuadër të krijimit të Akademisë së Arbitrimit në Shqipëri. Duke mirëpritur autoritetet më të larta të futbollit shqiptar, shefi i Departamentit të Edukimit Fizik Dr.Edmond Biçoku, ka theksuar se kjo inisiativë e Federatës, është një mundësi më shumë edhe për studentët e Elbasanit, për tu bërë pjesë e sistemit të arbitrimit në vend. Federata Shqiptare e Futbollit ka përcaktuar tashmë një strategji të detajuar për rekrutimin, edukimin dhe kualifikimin e arbitrave të futbollit. Kështu është shprehur presidenti i Federatës Shqiptare të Futbollit, Armand Duka, gjatë këtij takimi. ” Pas një pune parapërgatitore, mund të them se Akademia e Arbitrimit do te jetë gati brenda muajit Shtator. Do të jenë organizmat dhe komisionet përkatëse ato që do të analizojnë gabimet e arbitrave, për të mos lejuar që loja e futbollit të humbë bukurinë e saj.” Në fjalën e tij, presidenti i FSHF Armand Duka ka theksuar edhe njëherë se “Futbolli shqiptar është rritur shumë cilësisht dhe mund të krahasohet denjësisht tanimë, me kampionatet e tjera të rajonit.”

Aktivitet me rastin e 7 Marsit në Fakultetin e Shkencave të Edukimit

Me rastin e 7 Marsit, Fakulteti i Shkencave te Edukimit organizoi nje takim me ish-nxenes te Shkolles Normale. Te ftuar te nderit ishin: Z. Rudolf Deljana, Prof. Dr. Ali Shashaj, Z. Hyqmet Shingjergji dhe Z. Ali Kopili. Ne takim moren pjese studente dhe pedagoge. Gjatë këtij takimi të ftuarit kanë ndarë me të pranishmit momente emocionuese të jetës së tyre profesionale, një jetë kushtuar e gjitha arsimit.